Sapa Paling Kras?

Ini cerita dari hutan belantara... Kam su tau to binatang yang paling rasa diri hebat tuh cuma singa saja... Karna de rasa de yg paling kras di hutan, de jalan sambil bikin diri inti ka ini. Pas de jalan begini de ketemu Gorila baru de tanya ...
Singa : Hei Gorila... siapa yang paling kras di hutan ini??
Gorila : Kakaaaaa... ade hormat... kaka ko saja yg kras!!
Singa de bangga skali... de jalan lagi de ketemu banteng trus de tanya lagi...
Singa : Ehh banteng, ko mo kemana? sa mo tanya ko dulu, di hutan ini siapa yang paling Kras??
Banteng : Booo... kaka... trada lagi yang lain, cuma kaka ko saja yg kras!!
Singa de tambah semangat skali... de jalan lagi begini de ketemu Gajah, baru de tanya lagi...
Singa : Woi Gajah... siapa yang paling kras di hutan sini??
Gajah de tra jawab. Singa tanya ulang lagi...
Singa : Woii ko tuli ka? telinga besar baru tra bisa dengar lagi... siapa yg paling kras di hutan sini???
Gajah de diam saja. Singa tinggal tanya terus sampe gajah de emosi baru de pi jalan menuju singa dan de bikin tendangan maut satu kali sudah moo... Singa ko talempar jauh... Tapi Gajah nih blum puas...de lari kesana de injak, de sepak, de banting, de smackdown sampe Singa ko napas satu-satu... langsung Singa de bilang sama Gajah.
Singa : Iyo sudah Gajah... kalo memang ko tra tau de pu jawaban ko jang marah begitu...