Otek

Ada anak kecil dua, yang satu nama Yakob, yang satu lagi nama Salomo. Dong dua nih masih sodara jadi tinggal satu rumah... Satu hari begini dong dua dapat suruh dari dong dua pu tete untuk pergi beli cat minyak di toko bangunan... Tapi dong dua salah masuk ke toko buku ka ini... Jadi yang jaga toko nih kase tau klo dong dua salah masuk... Jadi dong dua keluar baru baku tawar di luar...
Yakob : Salomo, ko bodok skali ini toko buku...
Salomo : Bah ko tau dari mana????
Yakob : Ko baca di atas itu T-O, To... K-O, Ko... B-U, bu... K-U, ku... TO-KO BU-KU... ko mengerti ka tra???
Salomo : Ah ko tra kase tau dari tadi baru...
Yakob : Abis ko tra tanya jadi... bikin tau-tau skali...
Salomo : Tapi Yakob, ko pintar skali e... ko su bisa baca...
Langsung Yakob ko bikin batuk-batuk sombong ka ini... sambil tunjuk ke de pu testa...
Yakob : Makanya... skul... skul...
Salomo : Beh, skul tuh artinya apa lagi????
Yakob : Beh, ko tra liat ka... (sambil tunjuk-tunjuk testa lagi) skul itu Otek... Otekkkk!!!!!!