Takut Terlambat

Ada pace satu nih, de mo berangkat jam 5 pagi deng kapal putih. Trus de bilang sama de pu anak...
Pace : Anak, ko nonton bola tapi sebentar pagi ko kase bangun bapa jam 5 eee… abis bapa mau berangkat jadi..
Anak : Iyo... bapa ko tidur sudah... nanti baru sa kase bangun....
Tapi anak nih de nonton sampe de juga tatidur baru kaget bangun sudah jam 6 langsung de bilang ”Yeskon… bapa kapal su mau berangkat!”
Pace ko kaget bangun langung pegang tas trus panggil ojek. Tuhar… pace sampe di pelabuhan karna buru-buru pace lupa bayar ojek. Langsung pace lari ke dermaga, pas sampe di jembatan kapal pu jarak dengan jembatan kira-kira dua meter. Pace ko langsung buang tas tagae di tangga-tangga kapal, baru pace buang badan langsung bagantung di tangga-tangga kapal. Be... orang-orang di pelabuhan semua liat pace baru dong macam heran ka… Trus ada yang tanya
Mace: Pace ko mau kemana?
Pace : Sa mo brangkat nih...
Mace: Ji... pace kapal itu baru mo sandar ko u pi lompat duluan tuh...
Pace pu ganas saja… karna buru-buru sampe su tra cuci muka, tra minum teh, tra bayar ojek, baru sampe di pelabuhan kapal baru masuk...