Penatua

Kebetulan ada Rakernas Gereja-Gereja di Jakarta dan semua Pendeta dapat undangan buat hadir. Karena Pendeta satu ini de ada halangan makanya de utus de pu Penatua buat ikut Rakernas. Boooo pace Penatua de pu senang saja... Trada yang blok lagi. De pulang sampe dirumah langsung de panggil de pu anak istri dan pace mulai kase pengumuman...

Penatua : Anana... Bapa mo berangkat ke Jakarta buat ikut Rakernas Gereja...
Anak :Yooo... Trapapa tapi bapa hati-hati sebab di sana tu banyak Kupu-Kupu Malam...
Penatua : Neh....kupu-kupu malam itu apa ka?
Anak : Ba... Bapa ko tra tau ka... kupu-kupu malam itu yg disini dong biasa bilang Bote itu...
Penatua : (bikin malas tau)... Ae bapa ini Penatua to... Jadi tramungkin macam-macam...
Anak :Yooo... Trapapa sa cuma kastau saja...

Pace ko berangkat ke Jakarta... Setelah 5 hari Rakernas hari terakhir begini pace ambil keputusan untuk pulang jalan kaki, abis de su pamalas naik mobil jadi... Kebetulan pace mo cuci mata sedikit lagi jadi... Pace ko jalan sampe di gang sempit satu begini pace dengar suara perempuan di belakang dia...

Perem : Mas... Mampir dulu mas...
Pace tra sibuk… De tinggal jalan trus...
Perem : Mas... Mampir dulu dong mas...
Pace tra pusing… De jalan trus…
Perem : (makin dekat) Mas... Mampir dulu dong mas...
Pace ko bale begini de liat mbak satu dibelakang dia dengan penampilan sexi, trus pace dengan suara besar...
Pace : Eeeeee... Ko tra tau ka sa ini Penatua...
Perem : (dengan suara lembut de jawab) Mas... biar Penanya udah Tua yang penting kan Tintanya mas...
Pace de langung tancap gas... Sampe jauh baru de bilang : Ooooooo mangkali ini sudah yang anak de bilang deng Kupu-Kupu Malam itu....