Nene Naik Motor

Dengar Metu de ada kase panas motor buat mo jalan, Metu pu nene yang su bagaya rapi nih cepat-cepat keluar dari rumah...

Nene : Metu, ko mo ke?
Metu : Mo jalan-jalan tooo!!!
Nene : Aee, ko antar nene ke pasar deng motor dulu...
Metu : Arooo, nene! Sa mimpi ka pa, nene biasa naik taxi too, kapan nene ko naik motor, sa tra pernah tau tuh...
Nene : Beh, nene dulu pembalap nih, ko kira ka?
Metu : Adooo nene... Jang ko main-main eee..
Nene : Sudahlah, jang bicara banyak, sini bonceng nene...

Metu mo melawan tapi nene paksa trus, akhirnya Metu mengalah

Metu : Iyo sudah... Nene naik dibelakang tempo, tapi tahan kuat-kuat eee...
Nene : Bah sippp! Sudah nih...
Metu : Nene, su tahan kuat-kuat ka blom??? Sa biasa balap nih...
Nene : Neh jalan sudahhh... Sa su tahan kuat-kuat moo...

Metu kase masuk gigi satu dan motor mulai lompat jalan, tapi bersamaan dengan itu ada bunyi ”brrukk!!!!” di blakang motor. Metu cek begini, nene ko yang jatuh taduduk di tanah....

Metu : Bah, nene, sa bilang tahan too, knapa nene bisa sampe jatuh??
Nene : Iyo sa su tahan kuat-kuat moo…
Metu : Nene ko tahan dimana?
Nene : (marah) Mo dimana lagi, sa tahan di pagar tooo!!!!
Metu : Astaga... Tahan di motor to nene, jang di pagar!!!!