Salah Produk

Ada pace dua to... Dong dua baku janji ketemu malam minggu di lapangan Mandala . Jadi pace yang satu de pu tugas siapkan anggur Koleson, trus de pu teman yang satu de cuman standby di lapangan deng bekal semangat sama gelas takar ka itu. Akhirnya pace dong dua ketemu di lapangan. Baru dong duduk tekan barang itu. Karna rasa enak satu minta tambah ka ini, jadi de pu teman yang standby dilapangan kase uang lage suruh pi beli baru ka ini. Pass de pu teman yang pi beli barang tiba di muka toko begini lampu padam. Jadi mas yang jual ko kase barang salah ka itu, bukan anggur yang de kase tapi kecap manis. Tra lama, pace yang pi beli anggur de su tiba di lapangan. Trus de pu teman yang dilapangan langsung robek karton, baru gigit penutup botol, langsung tengki ka ini... Tapi macam de rasa anggur nih kenapa manis skali eee... Baru de pu teman bilang "Ah itu mungkin produk baru ka pa..."