Kaki

Ada mace satu de pinjam uang sama koperasi simpan pinjam. Orang dari koperasi itu datang trus untuk tagih utang. Karna mace ko malas bayar baru tambah lagi dong hampir datang tiap hari jadi mace ko tambah malas sudah. Pas satu siang nih mace ko ada santai di depan rumah, tapi mace ko kaget karna ada petugas yang datang jadi mace ko masuk sembunyi di dalam kamar tidur. Karna mace ko berdiri pas di belakang kain gorden kamar, jadi mace ko pu kaki kelihatan. Petugas langsung tanya sama mace da pu anak yang lagi main di depan. Tapi sebelumnya mace de masuk sembunyi de su bilang buat de pu anak kalo ada yang tanya bilang mama ada pi ke pasar.
Petugas : Slamat siang ade, ada mama ka...?
Anak : Slamat siang om, mama de ada pi ke pasar
Petugas : Mama su ke pasar dari tadi ka...?
Anak : Iyo... mama de su pi dari tadi...
Tapi petugas ko rasa aneh karna de liat mace pu kaki ada kelihatan dari dalam kamar, pas di belakang kain gorden, langsung pace petugas ko bilang sama anak kecil tadi...
Petugas : Ade mama ada kemana tadi...?
Anak : Mama de ada ke pasar om...
Petugas : Oh iyo sudah, ade om jalan dulu eee... tapi tolong bilang sama mama, lain kali mama kalo mo ke pasar ingat bawa mama pu kaki eee...