Pesan Tertulis

Ada pace deng mace dong pu kebiasaan tuh kalo baku marah dalam rumah, dong tra baku bicara. Baku diam ka ini. Kalo mo bicara begitu, dong pake cara tulis pesan di kertas trus kase tinggal ditempat yang gampang keliatan supaya dong pu pasangan bisa baca. Satu malam begini dong dua baku marah lagi jadi tra baku bicara. Trus begini pace ko ingat kalo besok ada rapat di kantor jadi de harus datang tempo supaya tra terlambat to. Pace ko mo suruh mace kase bangun tapi dong dua ada baku marah jadi terpaksa pace ko ambil kertas baru tulis : ”Mace! Tolong kase bangun sa jam lima eee... abis besok ada rapat dikantor jadi”. Pace ko taro kertas tuh dipinggir tempat tidur, trus pace ko tidur sudah mo. Mace sebelum mo tidur begini de ada liat pesan itu. Begini su jam lima, mace ko bangun duluan, tapi karna masih baku marah jadi mace ko ambil kertas baru ko tulis : “Pace! Ko bangun sudah, su jam lima nih...” . Abis itu mace ko taro kertas disamping pace, trus mace ko pi ke pasar. Pace ko kaget bangun begini su jam delapan. De macam su ganas mace skali eee... tapi pace de lihat ke samping tempat tidur begini ada kertas yang mace tulis. Pace ko baca dan tra jadi marah. Jadi pace ko pi ke kantor diam-diam saja.