Pagar

Pace satu de habis cat de pu pagar karena su mo dekat Natal ka ini... Tiga hari de cat sampe pagar tuh keliatan bagus skali, warna-warni ada de pu lampu-lampu lagi. Pokokny mantap sudah. Selesai cat, de duduk sambil isap rokok di de pu teras rumah. Tra lama begini ada trek satu atrek di depan pace ko pu rumah. Dan tra sengaja trek ini de tabrak pagar tuh dan langsung pagar rubuh. Pace de emo sampeeee... de tarik de pu parang dan langsung menuju ke sopir trek.
Pace : Ehh... setan!! ko turun cepat... ko brani skalitabrak sa pu pagar.... ko tra tau kalo sa ini su cape-cape cat pagar nih baru ko datang langsung main tabrak saja!!!
Tra lama pintu depan trek terbuka baru laki-laki satu turun. Pace yang pu pagar nih de perhatikan mulai dari bawah.... sepatu laras, celana loreng, sangkur di pinggang, baju loreng, di lengan ada tanda empat garis kuning, pake baret ungu...... dan pace mendadak gugup langsung!!!! Tapi supir trek nih de minta maaf sama pace dia.
Supir : Aduh bapa, sa minta maaf sa tra sengaja su tabrak bapa pu pagar nih... biar nan sa suruh sa pu anak buah dong datang perbaiki sudah....
Tapi karna pace su terlanjur gugup duluan dan langsung de sambung...
Pace : Ahh sudah bapa trapapa... bapa tra salah, sa pu pagar yang salah... su liat ada trek mo mundur baru de tra pindah lagi...