Karna Cinta

Ada laki-bini nih, yang mace nih de paling rajin ke gereja sudah, rajin berdoa, pokoknya de paling setia skali. Tapi, de pu laki nih, paling kapala mabuk eee, klo selesai mabuk tuh de pasti pulang langsung pukul-pukul de pu maitua trus. Satu kali begini de pu maitua pi gereja trus ada kesempatan kesaksian di depan jemaat, jadi mace ko maju untuk kase kesaksian...
"Shallom jemaat semua yang terkasih, sa bersyukur skali karna sa masih bisa hidup, sa mo kase kesaksian ke kam smua. Sa nih hidup paling menderita skali, kam tahu jemaat sa pu paitua tuh setiap hari kerja mabuk saja, de klo su pulang ke rumah de tinggal marah-marah sa, de pukul-pukul sa, sampe sa tinggal menangis2 trus, tapi sa tra pernah balas dia, sa diam saja de mo pukul sa ka, de mo bikin apa sa ka sa diam saja. Tapi kam tahu, kenapa sa tra marah dia? kam tahu kenapa sa diam saja? Kam tahu ka tidak? Kam tahu kenapa? Karna cinta toh...