Berita Pasti Dari Kampung

Pace satu nih de kepala mabok skali, baru de kerja di Pemda. Satu pagi begini, pas awal-awal bulan ka itu... mo trima gaji to... Pace ko masih tidur sono. Begini de pu maitua su bangun trus mandi baru kabur ke kantor untuk ambil de pu gaji nih, mace tau saja klo pace yang ambil berarti uang habis beli miras. Pace kaget bangun begini de maitua trada di rumah, de tanya de pu anak, trus dong bilang mama su keluar pagi-pagi tadi. Pace mandi trus de ke kantor sambil siul-siul, begini de pu
teman-teman tanya...
Teman : Be pace... hari ini ko macam smangat ka?? Ada apa e???
Pace : Iyo to... kan sekarang mo trima gaji to...
Pace de pu teman-teman langsung bongkar ketawa baru bilang tadi pace punya maitua su datang ambil gaji... Ale... pace de emosi skali... langsung kabur pulang, sampe di rumah de kunci pintu semua baru pukul de pu maitua deng anak-anak sampe trajadi. Trus de keluar duduk di depan teras baru isap rokok sambil siul-siul. Begini tetangga tanya pace...
Tetangga : Pace, ko pu istri deng anak-anak kenapa ka dong menangis?
Pace : Tra tau dorang nih? Berita dari Kampung belum pasti lagi dong su menangis duluan...
Pace ko lanjut tarik rokok. Kaget begini de pu maitua sms de punya om-om datang baru dong hajar pace sampe muka kotak ka... Pace ko menangis bokar-bokar sampe cakalele di lantai... Trus de pu maitua keluar trus ketemu tetangga satu, baru dong tanya...
Tetangga : Mace, ko pu suami de kenapa?
Mace : Itu baru berita pasti dari kampung jadi de menangis mada...