Artis

Tete dan nene dong dua mancing pake perahu di depan kantor gubernur situ. Tete ko duduk di blakang prahu, sementara nene di depan. Lagi asyik mancing begini, nene ko lihat mobil rame skali lewat di jalan, depan ruko dok II.
Nene : Adooo, kalo dulu sa mengaku sama sopir, mungkin sa skarang ada duduk siku di depan mobil sana eee...
Tete ko cuek saja, de lanjut serius mancing... Begini, pas ada pesawat garuda terbang diatas langit. Nene ko bicara lagi
Nene : Mamaee... garuda seh!! kalo waktu itu, sa balas kaka pilot pu salam, neh... mungkin sa ada ikut terbang di atas sana eee...
Tete mulai tra senang
Tete : Sueh... mancing diam sudah moo, ko bicara-bicara apa tuh, bikin ikan tra mau makan upan saja...
Tra tama begini, kapal Umsini masuk dari tanjug Kayubatu. Nene ko langsung batariak...
Nene : Boooo, surat dari kapten kapal tuh kalo sa balas, sungguh mati seh, sa pasti ada kancing deng kapten di kapal putih itu ka pa...
Tete langsung lihat nene deng mata ekor baru bilang
Tete : Aeee sudah... mungkin nene ko dulu artis ka pa...
Tete emosi patah, tete tarik jangkar, trus pangayo pulang....