Sebelah Juga

Ada polisi satu de masih muda. Sekarang begini de ada jaga di pos ka ini. Polisi ko liat begini ada anak-anak kecil dorang main di depan pos. Jadi pace panggil dorang...
Polisi : Ade, kam sini dulu...
Anak: (lari ke pos) Kenapa kaka?
Polisi : Kam pi panjat mangga itu ka...
Anak : Adoh kaka... pace yang pu mangga tuh... de jahat skali... baru sumbu pendek...
Polisi : Ah, trapapa ntar kaka yang bicara...
Anak : Iyo sudah kalo begitu...
Tra lama begini, pace yang pu mangga de datang baru pegang panah lagi.
Pace : Eh... setan-setan kecil!!! kurang ajar!!! tukang pancuri!!! kam turun cepat!!!
Anak : Aeh... malas!!! kaka sana de yang suruh tong ambil mangga...
Pace : Yang mana??? kam panggil dia cepat... klo trada sa panah kam nanti!!!
Anak-anak blom turun lagi polisi ko datang baru sapa pace ka ini
Polisi : (pegang pace pu pundak) Adoh bapa... sa minta maaf... sa yang suruh ade dorang panjat...
Pace : (kaget campur gugup ka ini) Ah... trada anak, bapa bilang... dorang turun dari pohon yang ini trus lanjutkan di pohon yang sebelah lagi....