Anjing Sakit

Markus nih de pu anjing sakit, de menangis sampe tra jadi punya, trus de minta de pu bapa panggil pendeta untuk berdoa supaya de pu anjing cepat sembuh ka ini. Markus de pu pace pikir, anak nih memang klo minta barang tuh pasti aneh-aneh. Pace ko kase pengertian, tapi Markus menangis terus, sampe de tra mau makan. Akhirnya, pace pergi panggil pendeta. Pendeta ko sebenarnya berat mo datang berdoa buat anjing, tapi pendeta pikir, tra papa sudah, pace datang berdoa biasa saja untuk bikin senang Markus pu hati.
Pendeta : Tuhan, anjing ini de lagi sakit, kalo Tuhan sembuhkan, kase sembuh dia, tapi kalo Tuhan mo ambil, ambil sudaah! Amin.

Dua hari kemudian, Markus pu anjing nih sembuh. Markus ko senang skali, trus Markus de ke pendeta pu rumah mo bilang trima kasi buat pendeta.
Tapi sampe di pendeta pu rumah, pendeta pu maitua bilang pendeta sekarang yang gantian sakit. Karena kasihan, Markus bilang sama pendeta...
Markus : Pak pendeta, bapa su berdoa sampe sa pu anjing sembuh, jadi bagemana kalo sa berdoa juga buat bapa?
Pendeta : (pace mo tolak juga salah-salah, akhinya pace setuju saja) Iyo sudah Markus... Markus : (ko berdiri tegap, lipat tangan, tutup mata dan deng suara keras dia sembayang) Tuhan, bapa pendeta lagi sakit, kalo Tuhan mo sembuhkan, kase sembuh dia, tapi kalo Tuhan mo ambil, ambil dia sudahhh!! Amin.
Pendeta : !!!???