Tete Deng Cucu

Satu pagi begini tete deng de pu cucu panggayung sante ke laut buat mancing ikan ka ini. Tapi macam sampe su siang bokar tra dapat ikan ka. Kaget begini mata kail tagate, cucu ko batariak sudah mo : ”Teteeee... ikan makan...”. Cucu ko coba tarik tapi macam ikan besar jadi tra kuat. Tete ko langsung turun tangan coba tarik, tapi krasss skali eee... Tete bilang : ”Cucu ini ikan besar sekali ko tunggu di perahu eee... Tete mo turun molo ambil ikan ini dulu”. Cucu bilang : ”Iyo sudah tete.. tapi tete jang lama-lama eee...”. Sudah tete langsung terjun dari perahu. Cucu ko tunggu 5 menit tete blum naik, 15 menit juga tete blum naik juga cucu mulai kuatir to... 30 menit juga tete tra naik-naik juga... Cucu ko langsung batariak : ”Teteeeeee ko jang main-main sudah naik tempo sudah supaya tong pulang... sa takut ini sendiri di sini...”. Tapi sampe matahari suda mo terbenam tete ko tra muncu-muncul juga, akhirnya cucu ko kembali ke rumah sendiri trus cerita. Semua sedih karena tete su trada. Acara tiga malam su di buat buat mendoakan tete yang tengelam dan tra di temukan. Besok pagi begini, cucu ko sementara duduk-duduk nonton begini, telpon bunyi...
Cucu : Halo... slamat pagi, ini deng apa ka?
Tete : Ini deng Salomo ka?
Cucu : Ahhh... ini siapa ka?
Tete : Salomo... ini deng tete nih...
Cucu : Ahhh tete... tong kira tete ko su mati... Tete skarang ko ada dimana?
Tete : Sudah... cucu kurang ajar... ko jang tanya lagi... uruh mama kirim uang tiket ka... tete ada di tanjung priuk nih...