Ada tete satu de pu kondisi su parah skali... Tete ini kena malaria tropica tambah lagi mata ikan satu di ketiak, satu di celah paha ka ini... Satu hari tete pu anak2 smua su pergi kantor, trus cucu2 dong su pergi skolah... Dorang kase tinggal tete sendiri di rumah berlabuh ka ini... Begini tete tidur sampe de haus....
Tete : Cucu.... Ambil tete air dolo...
[trada jawaban]
Tete : Cucu... Adoh dorang smua trada kapa?
[terpaksa tete ko ambil air sendiri]
Seperti rumah berlabuh lainnya, rumah besar lebih tinggi dari dapur jadi ada tangga kecil... Karna tete pu mata ikan jadi, tete de jalan pake tongkat... Pas tete mo turun dari rumah besar ke dapur begini, tete pu tongkat salah masuk di celah tangga trus tete ko jatuh uadh mo... Pas tete jatuh itu... Kepala kena balok sampe bentol trus tongkat hantam mata ikan dua2 picah bikin tete rasa macam su nafas terakhir ka ini jadi tete ko batariak....
Tete : Sio.... Tuhan, klo sa mo mati... Biar sa mati sudah, tapi mati saja persyaratan banyak sampe...
0 Comments:
Post a Comment