Main Bola Dalam Pesawat

Ini ada orang-orang gila dong mo dapat kirim ke RSJ dikota. Dong semua dapat angkut pake pesawat satu. Dalam pesawat begini dong ribut skali baru main bola lagi. Orang gila satu de lempar bola ke de pu teman gila yang lain. Pramugari de liat macam dong ribut skali jadi de bilang : ”Eh... kam jang baribut, jang main bola dalam pesawat, kalo mo main, diluar sana...”. Abis bilang begitu pramugari ko pergi. Tra lama begini pramugari ko kembali, de liat macam pesawat su sunyi baru tinggal orang gila empat saja yang ada dalam pesawat. Pramugari ko heran baru de tanya : ”Eh, kam pu teman-teman yang lain ada dimana?”. Orang gila satu de jawab : ”Tadi kan ibu ko suruh dong main bola diluar to, jadi dong smua su lompat main diluar”. Pramugari ko kaget tra baek trus de tanya lagi : ”Trus kam empat kenapa tra ikut main diluar?”. Baru orang gila satu de jawab begini : ” Kitong kan pemain cadangan, jadi tunggu kalo ada yang su cape main bola baru tong masuk ganti to...”